საქართველოს შოთა რუსთაველის თეატრისა და კინოს სახელმწიფო უნივერსიტეტში, დიმიტრი ალექსიძის სახელობის თეატრის სცენაზე, 2024 წლის ყოველწლიური სტუდენტური ქორეოგრაფიული ფორუმ-ფესტივალი „ტერფსიქორე“ განსხვავებულ ფორმატში გაიმართება.
წლევანდელი ფორუმ-ფესტივალი მისი ავტორისა და ხელმძღვანელის, ხელოვნებათმცოდნეობის დოქტორის, ასოცირებული პროფესორის, ქორეოგრაფ-ქორეოლოგის ანანო სამსონაძის ხსოვნას მიეძღვნება.
აღნიშნული ფორუმ-ფესტივალი და ყოველწლიური სამეცნიერო კონფერენცია ქორეოლოგიაში მან 2013 წელს დააფუძნა.
ფორუმ-ფესტივალის ფარგლებში, 1 მაისს, 13:00 საათზე, უნივერსიტეტის II კორპუსში, ელდარ შენგელაიას სახელობის კინოდარბაზში ჩატარდება სამეცნიერო კონფერენცია ქორეოლოგიაში.
17:00 საათზე, უნივერსიტეტის I კორპუსში, დიმიტრი ალექსიძის სახელობის თეატრის სცენაზე, ხსოვნის საღამოზე წარმოდგენილი იქნება ანანო სამსონაძის შემოქმედების ამსახველი ფოტო და ვიდეო მასალა.
ოჯახის წევრები, კოლეგები და სტუდენტები გაიხსენებენ მისი ცხოვრებისა და პედაგოგიური მოღვაწეობის გზას.